Sar somas cikňori miri daj amenge vakerlas paramisa so pes ačhila are amari osada.
Darekana ode bešelas jekh romni so pes vičinlas Margita. Niko nadžanelas khatar hini.Niko la nadžanelas nasas la nisavi famelia. Sas la kale jaka sar e rat pro šero la sas kali šatka a furt phirlas ča korkori.Pomali phirlas palo baruno drom opre ko pani.Kode peske furt cichones bešelas a dikhelas pro pani a te na, ta phirlas palo mostos opre tele. E Margita kada kerlas sako džives. Daresave roma vakernas že dzanelas te genel andalo vasta a že prindžarlas so pes kaske ačola. Daresave roma latar he daranas a džanas latar het. Aver roma la denas maro he pani kaj lenge mi phenel so len užarel.
Jekvar rači sar sas tates la o roma pale dikhle telo pro mostos pažo pani. Ča avka peske bešelas a cichones a dikhelas pro pani. Dikhelas pro hviezdi so sas pro nebos, dikhelas pre lende a phenlas peske.Avka pašes hine možno len he dochudava. Bešelas ode calo rat a he pre aver džives až avka la lakinenas kola hviezdi.Darekana khatar late dareko predžalas delas la maro he pani.Daresave roma la vičinenas kaj te avel khere ale oj nakamelas ča cichones bešelas a dhikelas pro pani he pro kola šukar hvizdi.
Pre aver rat so avľa pes majinde o hvizdi pale te sikavel aro pani ale e Marggita nadikla ani jek. Pro nebos sas bare kale mraky a dural phurdelas šiľali balvaj. O pani chudňa bare vlny a o pani demkerlas až pro baruno kopcos. E Margita sas sa cindži sar chudňa tedel o brišind. Varesave roma džanas kodarik a vičinenas LA kaj pes te garuvel bo avel burka. Oj nakamelas te šunel nikas a dader bešelas. Jekvareste avla o perumos a andalo nebos chudňa tedel igen baro brišind. E Mrgita sas imar igen cindži kolestar sar o pani demkerlas pro kopcos. O pani lake sas imar ži ko khoča avka baro brišind delas. Palo muj lake čuľanas o kvapky sar kaj te ruňahas. Abo o pani rovlas la Margitaha? Zorales phurdelas a o brišind zorales delas. Delas až avka že o štrechi le romenge hazkerlas.
Khatare osada pes kerdža cikno jarkos a džalas ko baro pani. O stromi pes tis mišto navisarkerde. Ajsi Bari búrka sas a o perumi demkernas že až o čhave pes daranas a o kana peske garuvnas. O pani pes hazkerlas mek buter až la Margitake sas o pani ži pažo pasos.
Demla o perumos avka zorales že demadža ži pre phuv. Akor pes o pani čidža avri a zalejindža sa o maľi.O brišind delas calo rat až do tosara. Ani jek rom nagela avri te dikhel kaj daranas až kIm nasas tosara.
Sadzik sas buď pani a bari čikh. Sar avla avri o kham o roma phende že džan te prikerel o mostos so sas cez pani.sar gele ko pani la daratar nadzanle so te kerel sar dikle la Margitakere topanky he o šatky so la sas pro šero. O roma la chudne te rodel rodenas la sadzik. Vičinenas pre late rodenas la, až aro veš ale nič. O pani la kodi rat iľa peha.
Sar dikhenas pre lakere renty so kode mukla o pani, o romňa so lenge veštinlas pes važlate chudne te modlinel. Modlinenas pes Zdravas Mária, Otče náš zagilade lake giľori pre lakeri pamiatka. Sar pes imar prežehninde a domodlinde pes zrazu dikhle pro pani a zjavinedza pes e Margita le cikne čavoreha. Sas oda ča okamihos o romnija so len dikle achalile že oda lakero čavoro. Azda les ode pažo pani furt rodelas ? Ko džanel možno he ov pela are koda baro pani. O romnija pes prežehninde ,pomodlinde a gele khere kaj te phenen savorenge so dikhle.
Odvtedy pes vakerel že te džaha rači pal koda mostos a dikheha andro pani šaj la dikhes sar pes bavinel le čhaha.Dareko len he šundža peha te vakerel ale ča tedy sar hino o pani cicho a o čonoro hino jasno.
O phure roma mek vakeren avke že te džaha pal koda mostos odi ora so pes kada ačhilas nadik aro pani buď bo saj la dikhes a šaj tut lel peha tele aro pani.
