Darekana mek akor are jek romaňi osada sas murš so pes vičinlas Samo.Sas igen barikano, zoralo a sako les šunlas.Sar dareso phenlas niko leske naprephenlas a imar vobec leske niko naodpehenelas.Leskero barikaniben barolas avka že peske pro nakh imar nadhikelas. Džalas lestar bari zor. O Samo peske až avka pačalas že peske duminlas že ov šaj kerel savoro. Duminlas peske že ov hino dareso buter sar aver džene. Až avka peske pačalas. Ale kada Samo nasas nek feder sas les jek baro hrichos furt prišahinlas pro nek bareder Del. Solacharlas pes vaš oda kaj leske o manuša te pačan. Peršo prišahinlas ča kurke, palis imar sako džives a prišahinlas pre savoreste. Solacharlas he pre peste až solacharlas pes choč les nasas čačipen. Či kada kerlas narokom abo na nadzanav ale vakerlas furt avka – hazdelas o vasta ko nebos he ko kham a phenelas : „Solacharav man tumenge pro somnakuno Del že vakerav čačipen.“ O Del sas cicho jekhvar, duvar he trival. O Samo pes šunelas sar daresavo Raj.
Jekh džives peske bešelas pre lavka paž peskro kher a šunelas pes sar kraľis. Dikhelas pre osada he pro khera a phenlas peske hoj ov šaj savoro.Zadumimen are peste nadikhľa že imar avla e rat. Kadi rat sas čudnako bo e balvaj naphurdelas a o rikone nahavkinenas. O Samo peske kada navšiminelas a ani nadikhla že palo drom avel varesi romni, sas phuri a aro purane gada. Niko la nadžanelas , a niko la nigda nadikhľa. O roma so la dikhle lake ča mangle lačo džives a gele latar het. E romni džalas peskere dromeha až ačhiľa pažo Samo a phendža leske: „Tu so tut solachares pro somnakuno Del džanes že o Del savoro dikhel a sa šunel“ O Samo la našunlas dikelas ča pre peste. No la phurakere lava šundzonas sar zvony pal cali osada. Ov pre late zadikľa a chudňa latar te asal phendza lake: bibi se oda ča lava nič pes naačhiľa. E phuri romni cichones terdžolas dikhelas pre leste dikhľa leske aro jakha a dujtoviras leske phendza aro jakha : „Tu nadžanes ze o lava hine sar bari čuri? Ča jekvar demeha a o rat nazačhaveha!“ No o Samo la nakamľa te šunel chudňa latar fes te asal asalas latar až avka že les oper chudňa te dukhal. Asalas avka že leske avla namište. La phurake rakindža a phendza lake oj tedžal lestar het bo sar na ta dikhela so ela… No e phuri nacholiľa gela pro drom demľa la pacaha pale phuv a po treci raz leske phendža : Koda so pes banges solacharel pro Del trestos les naobdžala!
Pre aver džives o Samo uštiľa sphagerdo sar kaj te sučhahas pro bara a na pro vadžos. O roma he o čhave a he o bakre mek sa sovnas. O Samo pes kamľa teomorel pal kady nalači rat. O Samo peske nakerlas nič kolestar so e phuri romni vakerlas a i tak so mekča phuterdža o jakha pale pes solachardža pro somnakuno Del. No so mekča kada phendža takoj oňemindža nasti diňa duma a našti phendža ani lavoro. O samo igen daraňa chudňa te denaškerel pale osada sar dilino. Denašelas sar graj opre tele kaj pes ča delas kamelas te phenel le romenge so pes ačiľa o vasta ko nebos hazdelas ale niko leske našti spomožindža. Andža až la romna so džanelas o čari ale ani oj leske nasti napomožindža. Kole bare dživesestar imar nigda naphendza ani lavoro.
Sas furt korkoro bešelas furt paže jagori. O roma paleste phirnas ale ov ča dikhelas adre phuv. Palo buter dživesa leha o roma preačile te vakerel preačhile paleste te phirel ča o čhavore are leste demkernas či dareso lenge naphenla ale ov nič ča dikhelas are phuv a cichones pisinkerlas pre phuv kolengere meni so krivo prišahinenas.
Ko le časostar te avel e balvaj nisostar nič sar pes dareko solacharel a o rikone nahavkinen o phureder roma vakeren avke: oda o Samo rodel kolen so pes solacharen a nane len o čačipen.
A mek vakeren o roma he avke: Pro Del pes nigda nasolacharel te tut nane čačo, bo o Del džanel savoro.
