Vakerel pes že darekana mek sar sas e phuv terneder džalas khatare osada baro jarkos. Koda pani sas ajso kalo že mek až o hvizdy pes daranas te dikhel andre koda baro pani. Ko namušinlas kodarik nadzalas, a ko he avka mušinlas tedžal ta ca raz dva a cichones kodarik predžalas.
O Roma dine le paneske nav Baro kalo pani vaskoda bo ca o Del džanelas so hin andro pani.
No he ajse ľudos esas so len o pani lakinlas peskera zoraha a kalipnaha. Možno vaskoda že he on kamenas ajsi zor sar hin andro kada pani , abo vaš oda že sas nevinna a o Del ajse manušen chraninel.
No he avka ke koda baro pani phirlas jek terni šukar čhaj, so pes vičinlas Marika. Kady čhaj sas cicho sar koda pani andro jakha la sas ajso švetlos so niko nasti murdarelas.Sako rat phirlas ko pani a giľavelas peske pale kamiben he pale buducnojsa so la užarel.
Oj giľavlas le jilestar giľavlas le paneske he le neboske . Vakerel pes že are kola gila hin o čačipen so del ča o Del . Bo amen o roma samas furt le Devleha, a the furt avaha.
Jek rat e Marika giľavlas pažo pani, šundza la jek gadžo andalo gav. Sas igen barikano he igen phuroro o lava les sas gule sar medos.
Zadikľa pes aro lakere jakha a šunelas lakere giľa palo kamiben.
Zakamadža pes are late sar o murš are romni. Kamelas la igen ale nasas oda dočačuni laska. Džanes sar pes vakerel avka sar chas a sal čalo no pale vibokhaľos abo sar pijes pani a pale sal smedno.
Avka he o goro pažo pani pes solachardža la Marikake že la lela romňake a že la lela peha are peskero kher.
No e Marika sas dilini igen leske pačaňa giľavlas pál lakero kamiben ko goro bo e Marika pes zakamla aro goro naise.Kole dživesestar pregela bud pani kole jarkoha. A o goro pes nasikadža bo le gores sas aver myšlienky . Sar la majindza telel romňake naavla palate. Daralas so pre kada phenena aver gore že peske lel obyčajno romaňa meľaľa čajora. Imar la nadikelas sar kodi rač.
E Marika pes sukares urdža aro parno viganos a užarlas les pažo jarkos. Užarlas pre leste jekh ora duj ori ale ov naavla. E Marika sas pre leste fejs cholamen ale hlavne sas sklamimen lakero jilo pukindža la dukhatar…
Soske mange klamimehas? Phendza cichones adnro baro pani. Šunelas pes oklamimen a hlavne pošpinimen. Ajsi cholamen koškerdza le gores he calo leskera famelia. O pani ča cichones šunelas so e Marika vakerel. O pani imar nasti dikla sar pes e Marika trapinel ozvindza pes ke late phendza lake: ko kajsi bari dukh andre laska kerel koles vaškada manca tele lava.
E Marika gela aro pani a le vasteha pes bavinlas pale hladina chudna the khelel a o pani la iľa peha. Vakerel pes že oda sas lakero posledno kheliben pre kada svetos.
A avka o parno viganos našliľa andro kalo pani a o kvitky so la sas andro bala džanas tele jarkoha sar te bi pes nič naačiľahas.
Pregela buď bers a o roma so dikhle so pes acila vakernas pál ada mek bud bersa .Palo buter bersa odaris džalas pale koda goro peskera romňaha a kamkľa leske te predžal cez koda jarkos.
Ov bisterdza pre savoreste he pre Marika he pro sľubos so phendza pažo pani, ale o pani nabisterdža so kerdža a so phendža e Marika, o goro gela andro pani a o pani les he leskera romňa iľa peha. Kole goreske nasas pomoca ani leskera romňake ole dživesestar o roma he o gore mek buter daranas odarik tedžal kole paneske dine nav cicho pani vaskoda so kerdza o goro la marikaha.
